Anansi me ana mahi toa =)

Tuhinga whakaahua tangata - Māeroero

Ngā tīmatanga paki e 2

Kua maroke katoa tōku waha, kia pēnā ki tētahi koraha o Āwherika. I ānini mārika tōku māhunga, me kī, i te pīoioi haere tōku ao.
"Auē taukiri e!" taku kōhimuhimu. Anō nei, taku ohorere ki te rongo i tāku reo, kua āhua rakuraku tana rerenga.
I tata tūtuki ahau... heoi anō, nāku ahau i whakatika me te whakaaro... ki te taka koe e hoa, ka hemo katoa. Kāhore anō koe mō te tū.
Nō reira, ko Ruthylu tēnei, te tangata kotahi e ora tonu ana i a Papatūānuku. Āhua 40 ōku tau, heoi anō, tē taea e au te whakapono... he whakapae noa. Ae marika, nā te aukatinga karaka e te Rangatira Claudius o te ao. Kua tōmuri a ia, ia rā, ia rā... Nā tana hōhā haere i aukati katoa ngā karaka, i ngā rorohiko, tae atu ki a Pīki Pene i Rānana....
____________________________________
"Shhhh!" tāku kōhimuhimu ohorere atu ki ōku hoa pūmau e huna mārika ana.
Kei rō ngahere kōpā, kua kōpiripiri katoa mātou, i te maha rawa o ngā rākau, ngā tupu, ngā aka e peia iho ana i a mātou.
E wiriwiri katoa ana tōku tinana, tū pakoki ai ōku huru-kiri, ā, ka mataku katoa au... ka hopu hau, e kore e taea e au te tuku.
Pā....HŪ! PĀHŪ!!
Koia tērā, te hoariri, te māeroero, e haramai ana!
"Auē!" tāku karanga. "E oma!"...

Hei ā hea pā mai ai te pōhekaheka ki ngā maramara rīwai nō Makitānara?

Inapō, i te mea he koha tā Whaea Carron ki ahau, i te hiahia au ki te aro ki te pānga mai o te pōhekaheka ki ngā maramara rīwai i Makitānara.

Ngā putanga iho i tērā tau:
Ko taku whakapae, kāhore te pōhekaheka i te pā atu, i te mea, 10 wīki te roanga o te whakamātau i tērā tau. Anō hoki, i te tīmatatanga i hē taku tukanga o ngā maramara rīwai ki te oko, wera tonu ai... Me makariri tuatahi i tēnei wā.

Me taurite ahau i ngā tipi rerekē

• Wendy's
• Burger King
• Te toa ika me te tipi (Tērā pea? I tēnei wā ka mau i ngā tipi Makitānara noa)

E āhei ana ahau ki te ako he pēhea te mōhio i te tikanga tunu kai tō Makitānara?

• Mā tētahi mīhini (i UoA, te tari pūtaiao pērā i a Liggin's Institute)?
• Mā tētahi pukapuka, paetukutuku rānei (Google, ngā wharepukapuka o Tamaki Makaurau)?
• Mā Makitānara (īmera, waea, ka haere rānei ki te tari matua)?
• Mā tētahi whakamātau (hinu, kia hia??)?

Wāhi / rauemi rangahau:
Rīpene

• Super-Size Me
• Fast-food Nation
• He mea anō? Me tiro ki a imdb.com...

Wharepukapuka

• Te Puna Mātauranga o Aotearoa (Nat. Lib - īmera ki a rātou)
• O te tāone
• He puka i te ipurangi?

Tangata

• uiangapatai.co.nz 
• Kerry Lee (he wahine hangarau)

Ko āku pātai i tēnei wā:

1. He aha ngā mea whakauru kia tunu i aua maramara rīwai?
2. He aha ngā rerekētanga i aua maramara rīwai ki ngā tipi nō wāhi kē?

I pēnei tāku whakamātau:

23.7 - Tukua ki rō oko i te wā kua mātao katoa (āhua 3 hāora).

Wīki 1 - Tango whakaahua ia rā hei te 11am me te huaki i te oko, hongi ai te kākara o ngā tipi.

Whai muri ngā rā e 6, kua tīmata te haunga haere, heoi anō, he pēnā katoa te āhua o ngā tipi ki te wā i hoko a Carron. He aha i pēnā ai?

(He tīmatanga noa tēnei o tētahi whakamātau pūtaiao ngawari. Anei āku tuhinga i te wā Tuhi Māhorahora i taua wā tonu.)

I tēnei wīki, ko taku hiahia ki te whakanui i ngā tuhinga o aku tamariki... he mīharo ngā whakaaro.

Ngā Puka Tūmatarau (Nō te pukapuka, "Books of Magic" nā Neil Gaiman).

CONSTANTINE:	Hei aha rā tēnei whakaaro!
TĀKUTA E:	E tā Con, pōhēhē katoa ahau kua tau kē tātou. Kāhore he huarahi tū atu ki tēnei.
I a rātou te tokowhā e hua ana, ka tiro mātou ki tētahi tama e eke papawīra ana ki te pito o te tāone o Rānana.
E TĀ HAHĪ:	Hei aha rā te whakaatū atu i te ao tūmatarau ki a ia. Ko tāku kē kia patu a ia, patua kia mate!
TE TAUHOU:	Ehara tēnā i te tika. Tērā pea ko ia tērā, te tūkino o ngā tūkino. Heoi anō, tērā pea, ko ia tērā, te kaiārahi o ngā tūmatarau rerehua huri noa.
TĀKUTA E:	Nō reira, hei aha te patu. Māku ngā tau o mua.
CONSTANTINE:	Māku ngā ao tū atu i tēnei. Hei te ao Tūrehu tīmata ai māua.
E TĀ HAHĪ:	Māku te huarahi o ngā tau e heke mai ana.
TAUHOU:	Māna te kōwhiringa, nē rā?
CON/TĀ E/HAHĪ:	(Tūngou ai) Ae rā!

He tauira tēnei o tētahi atu huarahi mō te tuhi māhorahora... Ki te kore whai kaupapa tuhi koe, tangohia tētahi pukapuka i te kokonga pukapuka o tō akomanga, whakamāori ai. He tino pūkenga tēnei =)

Tōku moemoea

I a au e moe ana, ka hua mai tētahi moemoea, tētahi moehewa...

Kua māruarua te pō, pango rawa te ao. Ko Hina noa tērā e whakairi ana i te rangi, heoi anō, ka huna a ia kei muri atu o ngā kapua pōuriuri. E rongo ana ahau ki te amuamu a Tawhirimātea. Kei te kura mātou ko ngā tamariki katoa. Ko te āhua nei, ko te Pō Whakamataku - nō reira, i huri rātou katoa ngā tamariki ki ngā taniwha. Ētahi ka tū hei taipō, kāore he paku reo kōrero tō rātou. Ka puta kē i tētahi mapu amuamu (he pērā ki te oro o ngā maikūkū e waku papamā ana). Kāore ō rātou taringa, tē taea e rātou te whakarongo. He kiri ūnahi wetiweti tō rātou, tae atu ki ngā ringa kōpiko, maikūkū koi rawa atu tō rātou.

Ētahi o ngā tamariki tipua ko ngā tāne tianaramana. Kāore rātou i te hīkoi ki runga tonu i a Papatūānuku, ko te rere kē te āhua o te hīkoi, kia 30 henimita te tawhiti i a Papa. Kāore ō rātou makawe, he karu whero tō rātou, kia pēnā ki te ahi e wera ana.

I te tīmatanga, pākoki katoa ahau. Tū mārika rawa... ko te āhua nei, e hiahia ana ahau kia tūmatapō. Whai muri tēnā, pātuki ohorere taku manawa, wiriwiri ohorere tōku tinana. Nā tēnā, i te oma ahau.... Ka haramai tētahi āhua! I a au e oma ana, ka rere!

Māu te whakatau, he moemoea rānei?

Rangirua - he rotarota kare-ā-roto

He kapua pūkohurangi e rērere haere,
Tē taea e au te kite...
WHĒKITE!!

He āwhiowhio e horomi ana i a au
Kāore tonu ahau i te mōhio kei hea a runga,
kei hea a raro?
Turuturu ana a toto
He hekenga roimata mutunga-kore...
"Auē! He aha i pēnā ai?"
Tukituki iho - Nā wai ahau i taupēhi?
Kua nehutia.

Me aha..? Ka pēnā, rānei?
Ā hea hoki maritau ai?
Ko wai ka mōhio?

Whakaahua tangata: Māeroero

Tōku ao

Kiwikiwi katoa te ao. Kāhore he paku tae, ahakoa ka tiro ki a Papatūānuku, ki ngā kararehe, tae atu ki a mātou ngā tāngata. Kāhore he tama, kāhore rānei ngā kotiro i tōku ao. He pērā mātou ki ngā matūriki.
Ā te wā ka tae taku pākeke ki te kotahi marama, ka wāwahi ahau kia 2 ngā tāngata. Kāhore a mātou whānau, otirā, he ōrite katoa a mātou pūkenga. He whakaaro kotahi tō mātou.

I pēnā ō mātou whakaaro ki ngā pōpokorua, ngā pī rānei...
Ia ata, ka oho-tahi mātou. Ka puta tahi atu ki te kai i ngā manga-mata rētihi me te kukuma. Whai muri tērā, me kura-tahi mātou.

Hōhā katoa au ki te kura. He ōrite ngā mahi ia rā. Ahakoa tērā, ka noho tau mātou katoa. Hei aha tērā! Ko taku hiahia i nāianei kia whai ahau i te ara tauhou rawa atu o ōku moemoea.

Ka rere whakarunga ahau - e topa iho ana ki te pā atu i ngā ngaru papaki o te moana. Ka parere, "Hōkiii...oi!"
He manu tipua ahau, āhua pēnā tāku rahinga ki tō te tangata. Ko te whānuitanga o ōku parirau ko te 2 mita. I whakapau 3 hāora i a au e rere ana... ā, ka tae atu ahau ki te pā hirahira o ngā atua. Āhua pēnā tēnā ki te Pourewa Teitei, arā, he rango teitei rawa e whātoro atu ana ki a Ranginui. Huri rauna te puku o te rango nā, tētahi poi tipua e kānapanapa koura ana.
I tau iho ahau.
"Hōkiiii...oi!"
"Tēnā koe e te Kākarapiti."
I mihi mai a Tāne Mahuta. Koia tērā, tētahi o ōku hoa pūmau. I tīni a ia tana hanga, i te rākau tipua rawa atu o te ao, tae atu kia pēnā tōna rahi ki te tangata. Ka tū ki mua tonu i a au tētahi tāne, he makawe kōrinorino kākāriki ōna e iri ake i tōna mahunga kia pēnā te hanga ki tō te kōhanga manu. Ko ōna karu he tae mutunga-kore e menemene mai ana. I ētahi wā, ko te kahurangi o te moana. I ētahi atu, ko te kākāriki o ngā parirau kea. I ētahi anō, ko te hiriwa o ngā toka pāua. Ko tōna tinana he rite ki tō te rākau, mātātoru, kaha ai.
"Kuhu mai kapu tī ai," e ai ki tāna.
Ko māua tēnei e kuhu ana ki tōku kāinga rua. Ko te pāhirahira tēnei o ngā pāhirahira. Mehemea ka rere ake ahau kia 30 pūtu te teitei ka pā ahau i te tuanui. He pātū aniwaniwā ēnei, e kānapanapa ana i te tini me te mano o ngā toka taonga kei rō pātū. He ao taiao hoki ki roto nei. Ka tiro ki te raki, ka kite atu i te Wao Nui ā Tāne. Ka tiro ki te rāwhiti, kei reira te koraha. Ki te hauāuru, koia te wāhi takutai me ngā ngaru e pāpaki ana i ngā taumata hīkoi.
I a au e noho ana, ka mahi tī a Tāne. Nā wai rā, i kuhu a Moemoea. He tāne teitei rawa, ko tōna tūpuhi he ōrite ki tō te purūma. Kiritea rawa tōna kiri, kia pēnā ki te marama. Ko ōna makawe, ōna kākāhu katoa, pōuriuri.... ki te kore kite i tōna kiri, ka tūmatapō a ia, tē taea te kite.
"He aha tō karere, e hoa?"
"Ka tū tētahi pakanga o te ao - auē, te mahi kohuru rā! Nā Joseph Kony ngā tamariki o te Perenihana i whakamate. Kua tū tētahi wānanga i te Whare Mā i Āmerika, nō reira, ko tōna tikanga, ka rere ngā pahū kārihi ao ake nei."
"Pae kare! Kātahi te karere pouri, ko tērā!"
"Ae. Me aha tātou?"
Rringgiii!!
Auē! I oho ake ahau, ngana ai te hītamo me te tūwaharoa, heoi anō, kua mauheretia katoatia! Ko au tērā e mau kōti pōrangi ana, e noho ana ki waenga-pū i tētahi rūma mā katoa, he whēkau kua tuia ki ngā pātū, kia kore ahau e taea te patu, te raku, te paku aha rānei.
'Ka hinga te ao? Ko wai ahau? Āiauē, kāore au i te paku mōhio ko te aha te pono - kei hea ngā āhuatanga tūturu? I ahatia?'
E rongo ana ahau i tētahi oro ngāeheehe, ka tupu haere, ka whēorooro. Ka tupu tonu. Ka aurērere te whenua, ā, ka tuhi mā katoa te ao - kāhore he paku kitenga, kāore he aha rānei e ora tonu ana i te ao.
Kua mate tātou huri noa.

Whakaahua tangata - Ko Tia

• pouaka tōna kāinga i a ia e pēpi ana
• whānau mai ia i te oumu tūmatarau
• reka
• ōrite katoa ngā tinana (pērā ki ngā mahanga)
• teitei
• mahi tūmatarau ōna
• he kuia i ēnei rā

I te tirohanga tuatahi atu ki a Tia, ohorere  mārika katoa au. Ko tōna teitei he ōrite ki te ngeru, nō reira, poto rawa atu a Tia. He kiri parauri tōna, kia pēnā ki te tae o ngā one-māra o Papatūānuku. Rawe me te reka hoki o tōna tinana, me kī, he wahine tipua a ia. Tatarihia....pānuihia tonu, kia mōhio pai koe he aha i reka ai ia....

Ananā, he wahine tiakareti a ia!

I a māua e tūtaki ana i a māua anō, i te noho māua, inu kawhe ai.
E ai ki tāna, "Ae, Ruthylu. I tōku ao, i te ōrite katoa mātou katoa huri noa. I tupu mātou i ngā rākau, heoi anō, kāore anō mātou kia whānau mai i taua wā, tae atu ki te wā kua hauhakengia e ngā kai-ahuwhenua."
"E kī, e mara! He aha ngā āhuatanga whai atu i tērā?"
"Taku hoa, nā ngā oumu tūmatarau mātou i whakawhānau. Ā, whai muri atu, ka noho kōpiripiri i te kōpātanga o ngā pouaka pōuriuri. Tatari ai mātou i ngā toa hokomaha. Ka taetae mai ngā tāngata ia rā, ia rā, tae atu ki te wā ka haramai tētahi tangata, tika katoa mōku. Ka rongo tōku wairua ki tōna waiata, tōna ierere e pā mai ana ki a au, ā, ka whakahoki atu ki a ia. Ao ake nei, he māhanga tūmatarau māua... ko tāua tērā..."

Whakaahua tangata (tākina tuāhangata)

E pēnā ana tāna tere ki te uirā e whaititiri ana.
"H...h...," ahakoa tāna rūhā katoa, te pau o tana hau, ka whakapau kaha tonu a ia... Arā, ko te āhua nei, ki te mutu tana omanga, ka mate a ia.

Ko wai tērā e whai mai ana i te kotiro taikaha nei? He aha i pēnei ai te tere o tana oma?

I te ngahere tarutaru a ia, kua rakua e ngā rākau koi, kua tūtukingia e ngā paiaka rākau. I ētahi wā, ko te ngāoki noa tana mahi i te maha o ngā tupu e kōpiripiri ana.
Koia tērā, te taiohi eiriana, te taiohi nō ao kē - he kikorangi tōna kiri, kia pēna ki ngā tai moana hei te wā e haka ana a Tamanui-te-rā. Ka neke, ka wiri, ka ngapu ōna makawe... anā, he nake kōwiriwiri e ngaru ana.

"Hssssss," ko tā rātou kōhimuhimu mutu-kore ai.
Kāhore ōna karu, tōna ihu, tōna waha.... he mānia katoa tōna kanohi tio. Ka kōrero, ka kite, ka rongo kē ōna makawe mōna.

He kōwhiringa tīmatanga

I ētahi wā nāku ētahi tīmatanga i tuhi. Nā ngā tamariki tētahi i kōwhiri (ki te kore i a ia tētahi kaupapa).

1. Tērā pea he Māori a ia...
2. Kua pouri katoa te ao, ka wiriwiri ahau i te mataku...
3. "Hoki oi! Hoki oi!" te karanga o te tipua rā...

"Hoki oi! Hoki oi!" te karanga o te tipua rā, Koia tētahi manu, ko te āhua nei he ēkara, he kākarapiti. Heoi, 10 mita te roanga o ōna parirau. Ko te parauri o ōna parirau e kānapanapa ana i ngā hīhī o Tamanui te Rā, he ōrite katoa a ia ki tētahi rangatira wehiwehi ana i te ao.
Ka tūpou iho ahau, huna ai waenga raupō me taku āwangawanga, 'Tērā pea i te hiakai taua tipua? I te hiahia kē a ia ki te patu i ahau? Me aha ahau?'
Kōkiri! Heke kōnei taua tipua tau ai. Kua pakoki katoa ahau i te mea, he kōrero kei te haere!
"E hine, he tono tāku," te parere a te tipua.
"H...he aha t-t-tō hiahia?" taku whakahokinga.
 "I ngaro taku pēpi. Kua pouri katoa tōku ao. E āhei ana koe ki te awhina i a māua?"
"Ae rā!"
I tūohu te tipua me te tohu mai, "Piki mai. Ka rere-tahi tāua."
Mīharo katoa tā tāua rerenga ki te rangi. He pēnā ki tētahi rōnakinaki, ka piki, ka piki, ka piki ake ki ngā kapua, ā, ka heke, ka heke, ka heke, he hekenga tere rawa atu ki ngā wai. I roa tā māua rapanga ki ngā tōpito o te ao. Hei te wā kua tata moe a Tamanui te Rā i te rongo ahau ki te pīpī e auē ana.
"Haere ki reira!" ko taku karanga...

I tiro mātou ki te kēmu Mahināriama - Mahināriama i te MataPuka (FaceBook)
I te whai whakaaro mātou ko wai ngā ingoa pai pea māna?

• Tangata TR
• Raparino
• Mihini Koi
• Aihi
• Ropati Rino
• Mihini Whātoro
• Kāpene

Mehemea e hiahia ana koutou ki te kite i tēnei kēmu mīharo:

• Mahināriama i Android
• Mahināriama i iTunes

Te karakia tō Tāwhaki me tana mahi tūmatapō

Ko te Horoeka, ko te Rō, Ko te Kikipounamu, Ko te Moko pirirākau, Ko te Matuku-hūrepo,

Whakarewa mai e Hinepūkohurangi

Kia pūrehurehu, kia kōataata, kia tūmatapō.

Haumi e, hui e, tāiki e.

I te mea ko tēnei āna kupu i a rāua ko tana teina e huna ana i ngā ponaturi... Ko taku hiahia kia poto te karakia, heoi, ka hiahia hoki ahau kia tika ngā whakaaro.

Ko ōku whakaaro:

1. He aha ngā rākau, ngā ngārara, ngā manu – he kaha huna tō rātou?
2. Ko wai tētahi/ētahi atua/tipua āwhina ai tēnei mahi?
3. He aha ngā āhuatanga ki mua noa atu o te huringa tūmatapō? 

I te whakaaro hoki au mō Rangi rāua ko Papa. Tae noa mai ki ēnei rā, mā rāua tātou e tiaki.

He pēhea hoki te riwha haere a Marama? 

Te Whakamāori - One Piece nā Eiichiro Oda

Māori translation of Eiichiro Oda's manga masterpiece - Vol 1, Ch 1 One Piece from Ruth Lemon

Malorie Blackman: Pūrongo Pukapuka

Nāna tētahi puka, Noughts & Crosses, i tuhi. Māna te pātai - He pēhea te ao īna kei ngā tāngata o Āwherika kē te mana, te rongonui, te pūtea, te rangatiratanga?
Ka pēnei tonu tā rātou pēhi i ngā tāngata Pākehā? He aha i riri ai tētahi iwi ki tētahi atu, ā, i pēhea whaitake ai tēnei āhuatanga?
I tēnei puka, ka aro ki tētahi whānau Noughts, arā, ki te tama tuarua o taua whānau, ko Callum. He hoa pūmau a Callum rāua ko Sephy, arā, ko Persephone, tētahi kotiro Cross. He nui ngā raru i pā atu ki a rāua... ahakoa tēnei, he hoa tonu tēnei takirua.
E āhei ana rāua ki te noho tau, ki te nohotahi, i tēnei ao, kāore ngā Noughts i te wātea ki te haere ki te kura? Ka tupu te aroha ki waenga i a rāua anō. Ka aha te ao i tā rātou kitenga o tēnei aroha.... Ka whakaae, rānei?
Paetukutuku o Malorie Blackman

Ki te kore whai kaupapa tuhi koutou hei te wā tuhi māhorahora....

Kāhore i a au tētahi kaupapa tuhi me taku HŌHĀ ki te tuhi! Ko tēnei te mahi kāhore he mahi kino tū atu i tēnei. Ia rā, ia rā... Ā te wā e tono ana te kaiako, kei raro au e pūtu ana, ka tutū ana te pūehu i te riri...
Ka hia kē au ki te tākoro pōro tapawhā... Ko au te kingi o tēnei kēmu i te ao, i te pō! Ko te terenga rerenga o te pōro, nā, tē taea te kite, nē rā? Ahakoa ka tae tere, ka tae pōturi, ka tae teitei, ka tae tata tonu ki a Papatūānuku, māku e whakahoki atu anō.

Pōtara, arā, te kūaha rerenga matū

"Pīpī!..... Patinka!"

Ohorere katoa ahau... Kāore anō au kia tae ki tēnei taumata o te kēmu, PŌTARA!
Kua roa te wā, takaroa, i a au e kimi ana i te huarahi whaihua o te rūma nei. Ia wā ka kuhu atu au i te kūaha rerenga matū - tae atu ki te taupēhi i te pou-nuku koura - ka kati i ngā kūaha hoki... Hōhā!

Kātahi, i taka te kapa... Mehemea ka whakamahi ahau i tētahi o ngā mataono tūmatarau 
 me te hiriwā, māna te kūaha e whakawātea kia tūwhera!


I rere tōtika atu ahau  ki te wāhi mutunga o te kēmu!


Ka waiata mai te rorohiko 'Kahuna Nui' (me te pōrangi) i tētahi waiata rā whānau ki a au??



"Nāu ahau i patu... kia mate.
Rā whānau ki a koe, kaingia keke ai.
Nāu ahau i taupēhi tonu... He aha ai?
Kei konei au hei kaiaromatawai mā te katoa
Ētahi ka mate i te mōrearea
Rā whānau ki a koe, kaingia keke
I a au e mate  haere ai..."
I a ia e waiata ana, i taua wā tonu, ka kite atu ahau i te whare katoa me tana pakaru haere. I ngā pātū tae atu ki te tuanui, ka pūehu iho.


Nō reira, ko rere kau atu ahau, kei mate i ngā pōro kohatu taka haere ai!


Ka takahuri ahau, he pēnā ki te pōro poipīrori, kātahi ka peke whakataha.... PAHŪ!!!
Kua tūtuki tētahi pōro kohatu tipua rawa ki te papa. Ki te kore karo ahau, kei raro au e pūtu ana! Auē, taukiri e!
Ka mapu, ka muku atu tāku werawera i te rae, kātahi ka piki ahau, ka piki, ka piki, ka piki. Ka pā mai ngā hīhī o Tamanui te Rā, ko takoto au, nā, i whātoro au me taku harikoa....
Ka mate, ka mate? Kao! Ka ora, ka ora!


Portal-the-flash-version nā ArmorGames
Official Portal site - te paetukutuku tūturu mō Pōtara =)

Rotarota ingoa

Rorohiko, e kā ana mō ake tonu atu...
(He) Uri tēnei nō Kōtihi, Wēra, Airihi, Celt, ā he whāngai o Ngāpuhi,
Tangi hotuhotu mō te pouri, te hari, te pūhaehae, te riri, te aha rānei ;P
He hikohiko nōku ki ngā mahi auaha, pōhewa, hanganga, tae atu ki te ako i ngā reo o te ao.

(Ko) Bali te whenua mīharo, kei a rātou te kōwhiringa reo, arā, kei a rātou te tangata whenua te mana reo!
Whiwhiwhī tōku arero i ētahi wā, ā, he mataku nōku ki te hapa haere, heoi...
Tarai tonu au ki te mahi - ka hapa, ā, ka ako =)

"Lemon? Ehara... ko Le Mon kē!" e ai ki ētahi ;)
E eke ana ahau i ngā rangi tūhāhā i ōku moemoea
Mārō ngā ūpoko o mātou katoa, o aku teina, o aku tungāne
Ohorere māua ko taku kotiro ia ata, ia ata...
"Nō reira, kua morena? Auē, te tōmuri! Kia horo, kia kakama... Me haere ki te mahi!"