"Auë!!" täku amuamu i te tangi parere mai o taku karaka. 'Kua ata? Ko te ähua nei, i te takoto iho au i näkuanei....'
I tukituki atu ahau ki te ruma horoi, tüwaharoa ai. 'Ko töku hiahia, kia pënei au ki taua rïpene... he roumamou täku hei whakatü wä... Moe, moe. Ka nui te hiamoe tonu.' He örite katoa täku hanga i ngä ata, ki tëtahi tipua weriweri rawa atu. Ka whawhai au ki öku makawe pöwhiwhi, ä, te paraihe kaha i öku niho e toe ana. 'Kawhe... kawhe.'
Nä tënei whakaaro ahau i kawe atu ki te kihini, mahi kawhe ai. Käore anö ahau kia oho tae noa kia tau au ki waho me taku inu wera. Kätahi anö ka taka taku kapa... Kua tiro au ki te wä i tënei ata? He aha kë te wä i näianei??
I taku rerenga ki roto, i pakoki katoa ahau... "Pae kare! E Mara, e oho i näiatonu nei! Kua waru karaka! Kia horo! Kia horo! Me wehe atu täua!" I taua wä tonu, i te oma wïwï wäwä ahau. Nä taku ohorere haere, i te kaha pöturi äku whakaritenga ki te puta i te käinga.
"Ko hea aku kï? Ko hea? Näu aku kï i neke??"
"E kao. Riria, kia tau. Whakaarohia, i hea tö waiho i ngä kï i napö?" te whakahokinga o taku teina.
"... Aaa ..." i a au e whakaaro ana, i te tiro iho ahau me taku kitenga o tëtahi rino e känapanapa mai ana ki te taha o te pouaka makariri. "Kua kitea! Ka rawe... me wehe täua!"
I tino waimarie mäua, i te mea, i whakakä tötika tö mäua waka taretare. Ki te kore hari me te koa tö mäua waka, he tikanga kia peia tahi mäua i te waka pöraruraru nei tae atu ki te puke tuatahi. I te taenga ki te tihi o taua puke rä, ka peke tere mäua ki rö waka me te whakakä i te wä o tana hekenga puke. Anö nei, te kaha o te reo o tënei waka! E ai ki a mäua hoa mahi, ki te rongo rätou ki te höhota, ki te pahü, me kï, ki te patero haere o tö mäua waka, e möhio ana rätou, ko te rima meneti, ka tae atu mäua ki te mahi.
Nö reira, i tae atu mäua ki mua noa o te wä tïmatanga mahi... Whiu! I kuhu mäua i ngä käkahu mahi me te whakawhiti kau atu ki a mäua wähanga. Kei te taha o ngä hü taku teina me taku ki te taha o ngä tarau. He tünga mahi maroke katoa ënei, heoi anö, he huarahi pütea, nä, ka whakapau kaha ahau i tënei mahi ia rä, ia rä, mo ngä tau e 5 i näianei. Kähore he rerekëtanga, tae noa mai ki tënei rä...
"Kua wä kai nui! Me haere täua ki te wharekai nä, në rä e Pare?"
"Ae, ka hiahia ahau i tënei rä ki te mokonui i tëtahi hamipeka."
"He aha täu?" ko täku ki a Puhi, heoi anö, kähore te ähua o te nanakia e tü ana ki öna whatu.
"Kia horo Riria. Ka pau haere te wä mokonui ki täu waea kohatu. Haramai," ko tä Puhi me tana kume i ahau.
Ka auë tonu ahau ki ahau anö me te whakaaro, tërä pea, kua hë taku rongo??
I tae atu mäua ki taua wharekai me te hïkoi tötika atu ki te wähi tono. Kua pakoki katoa ahau i te kitenga atu i ngä haina - 'Toka tïhi - $2', 'Papatarapeke mïti - $3', "Huarahi Kakapö - $3'! Kähore tëtahi atu i pënei ki ahau, nö reira, i tau mai te whakaaro, tërä pea, he mahi nanakia tënei mo tëtahi hotaka pouaka whakaata? "Ko hea ngä kämera?" ko täku ki a Pare.
"Iii, kaua e tiko mai ana koe ki tërä ngahere i könei," ko täna ümere ki ahau.
Kärangirangi katoa öku whakaaro me te auë, "Kua pä pea mai tëtahi mäuiui ki ahau e Pare. Ka hoki ahau ki te käinga."
I kite ahau i täna märamatanga-kore ki täku körero... He aha te ähuatanga kua pä mai? I hïkoi whakamuri ahau ki te küaha me te tütuki i tëtahi kuia.
"Taku aroha," ko täku.
I parere noa a ia. I tahuri ahau me te oma kau atu. Whëkite katoa töku ao, i te mea i te tangi hotuhotu ahau. Auë, auë! Orite te tere o taku oma ki te uirä e tuhi ana ki te rangi, ahakoa te roa o te wä oma. I te wä kua pau katoa taku kaha, i noho iho ahau me te mapumapu haere. Tüpou töku mähunga, tae noa kia körero tëtahi ki ahau...
"E te ngängara, ngä te köpae koe?"
Kähore he kupu whakahokinga äku... Ka oma teretere atu ahau ki töku waka. 'Kua pai i näianei. Ka hoki ahau ki te käinga, ä, whai muri te moe, ka tau anö töku ao.'
Heoi anö, i täku taraiwa atu ki te käinga, he përä öku whakaaro ki tëtahi hupa kua ranuranuhia katoatia. Kua tïni ngä haina katoa! Kähore he kïanga 'tiriti' e tü tonu mai ana... kua whakawhitia hei 'rorohiko'? Anö hoki, kua tïni haere ngä pü o roto o töku waka - he 'NG', 'WH', '*', '$', me te '(' kua whakaairohia ki te pou kïa?
I taku hokinga atu ki te käinga, i te huna ahau ki rö moenga. Ki mua noa o tërä, i te whakaaro ahau e kore e taea e au te haere pai atu ki te moe, heoi anö, kua moe tere ai ahau. I te wä i heke iho töku mähunga, kua moe (kua ngongoro pea. Ko tä Pare, koia taku mahi tuatahi i a au e moe ana, engari, käore ahau i te whakapono ki täna körero).
"Riria, Riria, e hanga, e hanga! Ngä te köpae koe?" ko tä Puhi i a ia e ngäueue i ahau.
"Ehara täku i te moemoea? Auë!" ko täku amuamu atu.
"Köpiri koia i te wiriwiri whakapono??"
Ko te ähua nei, kähore tüturu a ia i te whai märamatanga ki täku körero! I tau tëtahi whakaaro, nä, i te rere kau atu ahau ki te tiro ki tëtahi o a mäua pukapuka. Nä wai rä, i hoki atu ahau ki täna taha me te puka tuatahi kua kitea e au. I noho iho me te tiro ki te uhi... Kua tïnihia töna ingoa? Kähore tonu tënei e kï ana, "Ko te Taniwha i Tuara-Rangaia". Ka kï kë, "Mara te uwhiuwhi i Taniwha-Rongomai".
"Köpiri koia i te wiriwiri whakapono??" te körero anö o taku teina. Ka äta pupuri a ia i töku ringa me te arahi atu i ahau ki te rüma nohoanga.
"Köpiri", kätahi ka rürü a ia i töna mähunga.
"Köpiri - kähore", ko täku köhimuhimu.
I menemene a ia me te körero, "Pouri," i a ia e tüngoungou ana. "Koia," ko täna me te tohu ki ahau.
"Koia" ko täku me te whakaaro 'Koia = koe".
I tango a ia i tëtahi papakupu pikitia i tö mäua whata pukapuka me te tiro haere i äna kupu körero.
"Wiriwiri" me tana tohu ki te pikitia o ngä tamariki täkoro ai te 'Whai".
E pai ana ahau, ko täku ki ahau anö. Ahakoa kua mikirapu töku ao, töku reo rangatira... kei könei tonu taku teina ki te awhina i ahau. 'Köpiri [ahau] i te wiriwiri whakapono... [Käore ahau i te whai märamatanga, anö hoki kähore ahau i te möhio i ahu mai tënei ähuatanga i hea? Heoi anö, ka ora tonu ahau. Ka ako, ka ora.'
(I tö te whakaaro mo tënei paki i te mätakitaki atu i a Twilight Zone.)
